newsics.com
ಬೆಂಗಳೂರು: ಖಾಸಗಿ ಲಾಜಿಸ್ಟಿಕ್ ಕಂಪೆನಿಗಳಿಗೆ ಠಕ್ಕರ್ ಕೊಡಲು ಜಾರಿ ಮಾಡಿದ್ದ ನಮ್ಮ ಕಾರ್ಗೋ ಸಾರಿಗೆ ನಿಗಮದ ನಮ್ಮ ಕಾರ್ಗೋ ಅಟ್ಟರ್ ಫ್ಲಾಪ್ ಆಗಿದೆ.
ಒಂದ್ಕಡೆ ನಿರೀಕ್ಷಿತ ಆದಾಯವೂ ಇಲ್ಲ, ಇತ್ತ ಅದರ ನಿರ್ವಹಣೆಯೂ ಸಾರಿಗೆ ನಿಗಮಕ್ಕೆ ಹೊರೆಯಾಗಿದೆ.
ಪ್ರಾಯೋಗಿಕವಾಗಿ 6 ಟನ್ ಸಾಮರ್ಥ್ಯದ 20 ಟ್ರಕ್ ಗಳನ್ನು ರಸ್ತೆಗೆ ಇಳಿಸಿ ಲಾಜಿಸ್ಟಿಕ್ ಶಿಫ್ಟಿಂಗ್ ಶುರು ಮಾಡಿತ್ತು. ಒಂದು ವರ್ಷದಲ್ಲಿ 20 ಕೋಟಿಗೂ ಅಧಿಕ ಲಾಭದ ನಿರೀಕ್ಷೆ ಈ ಯೋಜನೆಯಿಂದ ನಿಗಮ ಇಟ್ಟುಕೊಂಡಿತ್ತು. ಆದರೆ ಯೋಜನೆ ಜಾರಿಯಾದ ಆರೇ ತಿಂಗಳಿಗೆ ನಿರೀಕ್ಷಿತ ಆದಾಯವಿಲ್ಲದೆ, ತಂದಿರುವ ಟ್ರಕ್ ಗಳನ್ನು ಡಿಪೋ ಹಾಗೂ ಇತರೆ ಸರ್ಕಾರಿ ಕೆಲಸಗಳಿಗೆ ಬಳಿಸಿಕೊಳ್ಳುತ್ತಿದೆ ಸಾರಿಗೆ ನಿಗಮ.
ಕಾರ್ಗೋ ಸೇವೆಗಾಗಿ ನಿಗದಿ ಮಾಡಲಾಗಿರುವ 20 ಟ್ರಕ್ಗಳ ಪೈಕಿ 14 ಟ್ರಕ್ಗಳನ್ನು ನಿಗಮದ ವಿಭಾಗಕ್ಕೊಂದರಂತೆ ಹಂಚಿಕೆ ಮಾಡಲಾಗಿದೆ. ಆ ಟ್ರಕ್ಗಳನ್ನು ವಿಭಾಗದಲ್ಲಿನ ಬಸ್ಗಳಿಗೆ ಬಿಡಿಭಾಗ ಸಾಗಣೆ ಸೇರಿದಂತೆ ಇನ್ನಿತರ ಕಾರ್ಯಕ್ಕೆ ಬಳಸಲಾಗುತ್ತಿದೆ. ಉಳಿದ 6 ಟ್ರಕ್ಗಳಲ್ಲಿ ಮಾತ್ರ ಸರಕು ಸಾಗಣೆ ಮಾಡಲಾಗುತ್ತಿದೆ. ಅಲ್ಲದೆ, ನಮ್ಮ ಕಾರ್ಗೋ ಸೇವೆಗೆ ಪ್ರಮುಖವಾಗಿ ಬೇಕಿರುವ ಲೋಡರ್ ಮತ್ತು ಅನ್ಲೋಡರ್ ಸಿಬ್ಬಂದಿಯನ್ನು ನಿಗಮ ನಿಯೋಜನೆ ಮಾಡಿಲ್ಲ. ಹೀಗಾಗಿ ಟ್ರಕ್ನ ಚಾಲಕರು, ನಿರ್ವಾಹಕರು ಸೇರಿದಂತೆ ಬಸ್ ನಿಲ್ದಾಣಗಳಲ್ಲಿನ ಸಿಬ್ಬಂದಿಗಳೇ ಸರಕುಗಳನ್ನು ಇಳಿಸುವುದು ಮತ್ತು ಟ್ರಕ್ಗೆ ಭರ್ತಿ ಮಾಡುವಂತಾಗಿದೆ. ಕಡಿಮೆ ವಾಹನ, ಲೋಡರ್ ಮತ್ತು ಅನ್ಲೋಡರ್ಗಳ ಕೊರತೆ ಕಾರಣದಿಂದಾಗಿ ಈವರೆಗೆ ನಮ್ಮ ಕಾರ್ಗೋ ಸೇವೆ ಆರು ತಿಂಗಳಿಗೆ 2 ಕೋಟಿಯೂ ತಲುಪಿಲ್ಲ.