ತಿರುಪತಿಯಲ್ಲಿ ಹತ್ತು ದಿನ ವೈಕುಂಠ ದ್ವಾರ ತೆರೆಯಲು ಚಿಂತನೆ

ತಿರುಪತಿ ತಿರುಮಲದಲ್ಲಿ ಪ್ರಸಿದ್ಧ ವೈಕುಂಠ ದ್ವಾರವನ್ನು ಹತ್ತು ದಿನ ತೆರೆದಿಡಲು ಚಿಂತನೆ ಮಾಡಲಾಗಿದೆ. ಪ್ರಸಕ್ತ ವರ್ಷದಲ್ಲಿ ಎರಡು ಬಾರಿ ಮಾತ್ರ ಈ ವೈಕುಂಠ ದ್ವಾರವನ್ನು ತೆರೆಯಲಾಗುತ್ತಿದೆ. ವೈಕುಂಠ ಏಕಾದಶಿ ಮತ್ತು ವೈಕುಂಠ ದ್ವಾದಶಿಯಂದು ಮಾತ್ರ ಈ  ಪವಿತ್ರ ದ್ವಾರಗಳನ್ನು ತೆರೆಯಲಾಗುತ್ತಿದೆ. ಈ ದ್ವಾರದ ಮೂಲಕ ಹಾದು ಹೋದರೆ ಪುನರ್ ಜನ್ಮ ಸರಪಳಿಯಿಂದ ಮುಕ್ತಿ ದೊರೆಯಲಿದೆ. ಶಾಶ್ವತ ಮೋಕ್ಷಪ್ರಾಪ್ತಿಯಾಗಲಿದೆ ಎಂಬುದು ಭಕ್ತರ ನಂಬಿಕೆ. ತಿರುಮಲ ದೇವಸ್ಥಾನ ಈ ಬಗ್ಗೆ ಚಿಂತನೆ ನಡೆಸಿದ್ದು, ತಿರುಮಲ ತಿರುಪತಿ ಆಡಳಿತ ಮಂಡಳಿಯ ಮುಂದೆ ಈ ಪ್ರಸ್ತಾಪ ಇರಿಸಲಿದೆ. ಆಗಮ ಪಂಡಿತರ ಅಭಿಪ್ರಾಯ ಪಡೆದು ಅಂತಿಮ ನಿರ್ಧಾರ ಕೈಗೊಳ್ಳುವ ಸಾಧ್ಯತೆ ಇದೆ.