ನವದೆಹಲಿ: ಸುಪ್ರೀಂಕೋರ್ಟ್ ಚಾಟಿ ಬೀಸಿದ ಪರಿಣಾಮವಾಗಿ ಏರ್‌ಟೆಲ್ 10,000 ಕೋಟಿ ಬಾಕಿ ಹಣ ತೀರಿಸಿದೆ.
ಈ ಬಗ್ಗೆ ಸೋಮವಾರ ಅಧಿಕೃತ ಹೇಳಿಕೆ ನೀಡಿರುವ ಏರ್‌ಟೆಲ್, ದೂರವಾಣಿ ನಿಗಮಕ್ಕೆ 10,000 ಕೋಟಿ ಹಣವನ್ನು ಪಾವತಿಸಿದ್ದೇವೆ. ಇನ್ನುಳಿದ ಬಾಕಿ ಹಣವನ್ನು ಕಂಪನಿಯ ಸ್ವ ಮೌಲ್ಯಮಾಪನದ ಬಳಿಕ ನಂತರ ಪಾವತಿಸುವುದಾಗಿ ಹೇಳಿದೆ.
ಪರವಾನಗಿ ಶುಲ್ಕ ಸೇರಿ ಇನ್ನೂ ಕೆಲವು ಶುಲ್ಕ ಮತ್ತು ದಂಡಗಳನ್ನು ಏರ್‌ಟೆಲ್ ಪಾವತಿಸಬೇಕಿದ್ದು, ಇನ್ನೂ ಸುಮಾರು 35,000 ಕೋಟಿ ಹಣ ಬಾಕಿ ಉಳಿಸಿಕೊಂಡಿದೆ.
ಟೆಲಿಕಾಂ ಸಂಸ್ಥೆಗಳ ಬಾಕಿ ಹಣ ಪಾವತಿ ಸಂಬಂಧಿಸಿದಂತೆ ಸುಪ್ರೀಂಕೋರ್ಟ್ ಇತ್ತೀಚೆಗೆ ಕೇಂದ್ರ ಸರ್ಕಾರವನ್ನು ತರಾಟೆಗೆ ತೆಗೆದುಕೊಂಡಿತ್ತು. ಸುಪ್ರೀಂ ಸೂಚನೆ ಬಳಿಕ ದೂರವಾಣಿ ಇಲಾಖೆ ಎಲ್ಲ ಟೆಲಿಕಾಂ ಸಂಸ್ಥೆಗಳಿಗೆ ನೊಟೀಸ್ ನೀಡಿ, ಬಾಕಿ ಹಣ ಪಾವತಿಸುವಂತೆ ಒತ್ತಡ ಹೇರಿತ್ತು.
ವೋಡಾಫೋನ್ ಐಡಿಯಾ 2,500 ಕೋಟಿ ಹಾಗೂ ಟಾಟಾ ಗ್ರೂಪ್ 2,190 ಕೋಟಿ ರೂ. ಪಾವತಿ ಮಾಡಿವೆ ಎಂದು ಅಧಿಕಾರಿಯೊಬ್ಬರು ಇಂದು ತಿಳಿಸಿದ್ದಾರೆ. ವೋಡಾಫೋನ್ ಐಡಿಯಾ ಕಂಪನಿಯು ಒಟ್ಟೂ 53,000 ಕೋಟಿ ರೂ. ಬಾಕಿಯನ್ನು ಪಾವತಿಸಬೇಕಾಗಿದೆ.
