ಸಿಎಎ ಪ್ರತಿಭಟನೆ; 498 ಪ್ರತಿಭಟನಾಕಾರರ ಆಸ್ತಿ ಜಪ್ತಿಗೆ ಕ್ರಮ

ಲಖನೌ: ಸಿಎಎ ವಿರೋಧಿಸಿ ನಡೆದ ಹಿಂಸಾತ್ಮಕ ಪ್ರತಿಭಟನೆಯಲ್ಲಿ ಸಾರ್ವಜನಿಕ ಆಸ್ತಿಗೆ ಹಾನಿಯುಂಟುಮಾಡಿದ 498 ಪ್ರತಿಭಟನಾಕಾರರ ಆಸ್ತಿಯನ್ನು ಉತ್ತರ ಪ್ರದೇಶ ಸರ್ಕಾರ ಜಪ್ತಿ ಮಾಡಲಿದೆ.
ಈ ಸಂಬಂಧ ಈಗಾಗಲೇ ಪ್ರತಿಭಟನಾಕಾರರಿಗೆ ಸರ್ಕಾರ ನೋಟಿಸ್​ ಕಳುಹಿಸಿದೆ. ಡಿ.10ರಿಂದ 24ರವರೆಗಿನ ಪ್ರತಿಭಟನೆಯಲ್ಲಿ ಸಾರ್ವಜನಿಕ ಆಸ್ತಿಗೆ ಹಾನಿಮಾಡಿದವರಲ್ಲಿ ಮೀರತ್​ ನಲ್ಲಿ 148, ಲಖನೌ 82, ರಾಮ್​ಪುರ್​ 79, ಮುಜಾಫರ್​ನಗರ 73, ಕಾನ್ಪುರ 50, ಸಾಂಬಲ್​ 26, ಬುಲಂದ್​ಶಹರ್​ 19, ಫಿರೋಜಾಬಾದ್​ 13, ಮಾವೋದಲ್ಲಿ 8 ಮಂದಿಯ ಗುರುತು ಪತ್ತೆಹಚ್ಚಲಾಗಿದೆ. ಈವರೆಗೆ 213 ಎಫ್​ಐಆರ್​ಗಳು ದಾಖಲಾಗಿದ್ದು, ಒಟ್ಟು 925 ಆರೋಪಿಗಳನ್ನು ಬಂಧಿಸಲಾಗಿದೆ ಎಂದು ಲಖನೌ ಡಿಜಿಪಿ ಮುಖ್ಯಕಚೇರಿ ಮಾಹಿತಿ ನೀಡಿದೆ.
ಸಾಮಾಜಿಕ ಜಾಲತಾಣದಲ್ಲಿ ಆಕ್ಷೇಪಾರ್ಹ ಪೋಸ್ಟ್​​ಗಳನ್ನು ಹಾಕಿದವರ ವಿರುದ್ಧ ಈವರೆಗೂ 81 ಎಫ್​ಐಆರ್​ ದಾಖಲಾಗಿದ್ದು, 120 ಆರೋಪಿಗಳನ್ನು ಬಂಧಿಸಲಾಗಿದೆ. ಭದ್ರತಾ ದೃಷ್ಟಿಯಿಂದ 144 ಸೆಕ್ಷನ್ ಹೇರಲಾಗಿದೆ. ಹಲವು ಜಿಲ್ಲೆಗಳಲ್ಲಿ ಅಂತರ್ಜಾಲ ಸೇವೆ ಸ್ಥಗಿತಗೊಳಿಸಲಾಗಿದೆ.