58 ಮತದಾರರ ಭೇಟಿಗಾಗಿ 11 ಗಂಟೆ ಅವಧಿಯಲ್ಲಿ 24 ಕಿ.ಮೀ. ನಡೆದ ಸಿಎಂ!

newsics.com
ಗುವಾಹಟಿ: ತಮ್ಮ ವಿಧಾನಸಭಾ ಕ್ಷೇತ್ರದ 58 ಮತದಾರರನ್ನು ಭೇಟಿಯಾಗಲು ಅರುಣಾಚಲ ಪ್ರದೇಶ ಮುಖ್ಯಮಂತ್ರಿ ಪೆಮಾ ಖಂಡು 24 ಕಿ.ಮೀ. ನಡೆದು ಅಚ್ಚರಿ ಮೂಡಿಸಿದ್ದಾರೆ. 11 ಗಂಟೆ ಕಾಲ ನಡೆದು ತಮ್ಮವರನ್ನು ಭೇಟಿಯಾಗಿದ್ದಾರೆ.
ಸಿಎಂ ಪೆಮಾ ಖಂಡು ಅವರು ತಮ್ಮ ಕ್ಷೇತ್ರದ 58 ಮತದಾರರ ಕಷ್ಟ-ಸುಖ ಅರಿಯಲು ಸ್ವತಃ ತಾವೇ 24 ಕಿ.ಮೀ ನಡೆದಿದ್ದಾರೆ. ಅವರ ಕ್ಷೇತ್ರದ ವ್ಯಾಪ್ತಿಯ ಲುಗುಥಾಂಗ್‌ ಎಂಬ ಗ್ರಾಮ ಭಾರತ ಮತ್ತು ಚೀನಾ ಗಡಿಗೆ ಹೊಂದಿಕೊಂಡ ಪ್ರದೇಶದಲ್ಲಿನ ಕುಗ್ರಾಮಕ್ಕೆ ನಡೆದು ಸಾಗಿದ್ದಾರೆ. ಈ ಗ್ರಾಮಕ್ಕೆ ಯಾವುದೇ ರಸ್ತೆ ಸಂಪರ್ಕ ಇಲ್ಲ. ಸಮುದ್ರ ಮಟ್ಟದಿಂದ 14500 ಅಡಿ ಎತ್ತರದಲ್ಲಿರುವ ಈ ಗ್ರಾಮದಲ್ಲಿ ಕೇವಲ 10 ಕುಟುಂಬಗಳ 58 ಸದಸ್ಯರು ವಾಸಿಸುತ್ತಿದ್ದಾರೆ. ಅಲ್ಲಿಯೇ 2 ದಿನ ಕಳೆದ ಸಿಎಂ ಖಂಡು, ಮತದಾರರ ಸಮಸ್ಯೆ ಆಲಿಸಿ ಮರಳಿದ್ದಾರೆ.
ಈ ಬಗ್ಗೆ ಟ್ವೀಟ್ ಮಾಡಿರುವ ಸಿಎಂ ಪೆಮಾ ಖಂಡು, 24 ಕಿ.ಮೀ ಚಾರಣ, 11 ಗಂಟೆಗಳ ತಾಜಾ ಗಾಳಿ ಮತ್ತು ಪ್ರಕೃತಿ ಅತ್ಯುತ್ತಮ. ತವಾಂಗ್ ಜಿಲ್ಲೆಯ ಕಾರ್ಪು-ಲಾದಿಂದ ಲುಗುಥಾಂಗ್ ದಾಟಿದೆ. ಸ್ವರ್ಗ ಸ್ಪರ್ಶಿಸಿದ ಅನುಭವವಾಯಿತು’ ಎಂದು ಹೇಳಿದ್ದಾರೆ.