ಕೊರೋನಾ ವಿಶೇಷ ವಿಮಾನದಲ್ಲಿ ಕೂಡ ಚಿನ್ನ ಕಳ್ಳ ಸಾಗಾಟ

ಕಣ್ಣೂರು, ಕೇರಳ: ಕೊರೋನಾದಿಂದ ಕೊಲ್ಲಿ ರಾಷ್ಟ್ರಗಳಲ್ಲಿ ಸಂಕಷ್ಟಕ್ಕೀಡಾಗಿರುವ ಕೇರಳಿಯರನ್ನು  ಸ್ವಂತ ಊರಿಗೆ ಕಳುಹಿಸಿಕೊಡಲು ದುಬೈ ಮತ್ತು ಇತರ ಪ್ರದೇಶಗಳಲ್ಲಿರುವ ಸ್ವಯಂ ಸೇವಾ ಸಂಘಟನೆಗಳು ಚಾರ್ಟರ್ ವಿಮಾನದ ವ್ಯವಸ್ಥೆ ಮಾಡುತ್ತಿವೆ. ಈ ವಿಮಾನದಲ್ಲಿ ಹೆಚ್ಚಿನ ಸೀಟುಗಳನ್ನು ಈ ಸ್ವಯಂ ಸೇವಾ ಸಂಘಟನೆಗಳು ಬುಕ್ ಮಾಡುತ್ತಿದ್ದರೂ ಕೆಲವು ಸೀಟುಗಳನ್ನು ವಿಮಾನ ಯಾನ ಸಂಸ್ಥೆ ನೇರವಾಗಿ  ಪ್ರಯಾಣಿಕರಿಗೆ ನೀಡುತ್ತಿದೆ. ಇದೀಗ ಇಂತಹ ವಿಶೇಷ ವಿಮಾನದಲ್ಲಿ ಕೂಡ ಚಿನ್ನ ಕಳ್ಳ ಸಾಗಾಟ ಪ್ರಕರಣವನ್ನು  ಕಸ್ಟಂಸ್  ಇಲಾಖೆ ಪತ್ತೆ ಹಚ್ಚಿದೆ. ಕೇರಳದ ಕಣ್ಣೂರು ವಿಮಾನ ನಿಲ್ದಾಣದಲ್ಲಿ ಚಿನ್ನವನ್ನು ಪೇಸ್ಟ್ ನ ರೂಪದಲ್ಲಿ ಸಾಗಿಸಲು ಯತ್ನಿಸಿದ ಒರ್ವ ಆರೋಪಿಯನ್ನು ಬಂಧಿಸಲಾಗಿದೆ.  ಆರು ಲಕ್ಷ ರೂಪಾಯಿ ಮೌಲ್ಯದ ಚಿನ್ನವನ್ನು ವಶಪಡಿಸಿಕೊಳ್ಳಲಾಗಿದೆ. ಇದು ಚಿನ್ನ ಕಳ್ಳ ಸಾಗಾಟದ ಎರಡನೇ ಪ್ರಕರಣವಾಗಿದೆ.  ಕಳೆದ ವಾರ 20 ಲಕ್ಷ ರೂಪಾಯಿ ಮೌಲ್ಯದ ಚಿನ್ನವನ್ನು ವಶಪಡಿಸಿಕೊಳ್ಳಲಾಗಿತ್ತು.