ಮೋದಿ, ಅಮಿತ್ ಶಾ ಇಬ್ಬರಿಗೂ ಪರಮಾಪ್ತ: ಜೆ ಪಿ ನಡ್ಡಾ ಮುಂದಿದೆ ಗಂಭೀರ ಸವಾಲು

ನವದೆಹಲಿ:  ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷರಾಗಿ ಹಿರಿಯ ನಾಯಕ ಜೆ ಪಿ ನಡ್ಡಾ ಆಯ್ಕೆ ಬಹುತೇಕ ಖಚಿತವಾಗಿದೆ.ನಾಳೆ ನಾಮಪತ್ರ ,ಸಲ್ಲಿಸಲಿರುವ ನಡ್ಡಾ ಜನವರಿ 22 ರಂದು ಪಕ್ಷದ ನೇತೃತ್ವ ವಹಿಸಲಿದ್ದಾರೆ. ಬಹುತೇಕ ಅವಿರೋಧ ಆಯ್ಕೆ ನಡೆಯಲಿದೆ. 1960 ಡಿಸೆಂಬರ್ 2 ರಂದು ಜನನ. ಎಬಿವಿಪಿ ಮೂಲಕ ರಾಜಕೀಯ ಅಂಗಳ ಪ್ರವೇಶ. 1978ರಲ್ಲಿ ಎಬಿವಿಪಿ ನಾಯಕನಾಗಿ ವಿದ್ಯಾರ್ಥಿಗಳನ್ನು ಸಂಘಟಿಸಿದ ಹೆಗ್ಗಳಿಕೆ.  ರಾಜಕೀಯ ಶಾಸ್ತ್ರದಲ್ಲಿ  ಎಂ. ಎ ಪದವಿ. ಜೊತೆಗೆ ಎಲ್ ಎಲ್ ಬಿ . ಇದು ಶೈಕ್ಷಣಿಕ ಅರ್ಹತೆ. ಪತ್ನಿ  ಮಲ್ಲಿಕಾ ನಡ್ಡಾ ಕೂಡ ಶಿಕ್ಷಣ ಕ್ಷೇತ್ರದಲ್ಲಿ ಗುರುತಿಸಿಕೊಂಡಿದ್ದಾರೆ.  ಹಿಮಾಚಲ ವಿಶ್ವವಿದ್ಯಾನಿಲಯದಲ್ಲಿ ಇತಿಹಾಸದ ಪ್ರಾಧ್ಯಾಪಕರಾಗಿದ್ದಾರೆ. ಉತ್ತರ ಪ್ರದೇಶ ವಿಧಾನ ಸಭಾ ಚುನಾವಣೆಯಲ್ಲಿ ತೆರೆಯ ಹಿಂದೆ ನಿಂತು ನಡ್ಡಾ ವಹಿಸಿದ್ದ ಪಾತ್ರ ಅಮೋಘ. ಇದು ಅವರಲ್ಲಿದ್ದ ಸಂಘಟನಾ ಕೌಶಲ್ಯಕ್ಕೆ ಹಿಡಿದ ಕೈ ಗನ್ನಡಿಯಾಗಿತ್ತು.  ನಿತೀನ್ ಗಡ್ಕರಿ ಮತ್ತು ಅಮಿತ್ ಶಾ ಜೊತೆ ಪಕ್ಷದ ಸಂಘಟನಾ  ಕಾರ್ಯ ಚಟುವಟಿಕೆಯ ಅನುಭವಹೊಂದಿದ್ದಾರೆ. ಜೆ . ಪಿ. ನಡ್ಡಾ ಅವರ ಮುಂದೆ ದೆಹಲಿ ವಿಧಾನಸಭಾ ಚುನಾವಣೆಯ ಗಂಭೀರ ಸವಾಲಿದೆ. ಇಲ್ಲಿ ಆಮ್ ಆದ್ಮಿ ಪಕ್ಷದ ಹವಾ ಜೋರಾಗಿದೆ. ಸತತ ಸೋಲಿನ ಸರಪಳಿಯನ್ನು ತುಂಡರಿಸಲೇ ಬೇಕಾದ ಅನಿವಾರ್ಯತೆಯಲ್ಲಿ ಕಮಲ ಪಡೆ ಸಿಲುಕಿದೆ. ಇಲ್ಲಿ ನಡ್ಡಾ ಯಶಸ್ವಿಯಾದರೆ, ಅವರ ರಾಜಕೀಯ ಅಭಿಯಾನ ಸರಿಯಾದ ಹಾದಿಯಲ್ಲಿ ಅಡೆ ತಡೆ ಇಲ್ಲದೆ ಸಾಗಲಿದೆ. ಇಲ್ಲದಿದ್ದರೆ  ಅಪಸ್ವರದ ಕೂಗು ಕೇಳಿಸಲಿದೆ.