ಬಾಲಿವುಡ್ ಡ್ರಗ್ಸ್ ಪ್ರಕರಣಕ್ಕೆ ಪಾಕ್ ನಂಟು!

newsics.com
ಮುಂಬೈ: ನಟ ಸುಶಾಂತ್​ ಸಿಂಗ್​ ಸಾವಿನ ಪ್ರಕರಣ ದಿನಕ್ಕೊಂದು ತಿರುವು ಪಡೆಯುತ್ತಿದೆ. ಆತ್ಮಹತ್ಯೆಯೊಂದಿಗೆ ಶುರುವಾದ ತನಿಖೆ ಡ್ರಗ್ಸ್​ ಜಾಲದೊಂದಿಗೆ ನಂಟು ಹೊಂದಿತ್ತು. ಮುಂಬಯಿಗೆ ಸರಬರಾಜು ಆಗುತ್ತಿದ್ದ ಈ ಮಾದಕ ದ್ರವ್ಯಗಳು ಪಾಕಿಸ್ತಾನದೊಂದಿಗೆ ನಂಟು ಹೊಂದಿರುವ ಸಾಧ್ಯತೆ ಇದೆ ಎಂದು ನಾರ್ಕೋಟಿಕ್ಸ್​ ಕಂಟ್ರೋಲ್ ಬ್ಯೂರೊ (NCB) ತಿಳಿಸಿದೆ.
ಡ್ರಗ್ಸ್​ ಆಯಾಮದ ಕುರಿತು ತನಿಖೆ ನಡೆಸಿರುವ ಘಟಕಕ್ಕೆ ಬಾಲಿವುಡ್​ ಮತ್ತು ಮುಂಬೈಗೆ ಕೊಕೇನ್​ ಮತ್ತು ಇನ್ನಿತರ ಡ್ರಗ್ಸ್​ಗಳು ಪಂಜಾಬ್​ನ ಅಮೃತಸರ ಮತ್ತು ಪಾಕಿಸ್ತಾನದಿಂದ ಸರಬರಾಜು ಆಗುತ್ತಿತ್ತು ಎಂಬ ಮಾಹಿತಿ ಲಭ್ಯವಾಗಿದೆ.
ಡ್ರಗ್​ ಪೆಡ್ಲರ್​ಗಳ ಹಿಂದೆ ಯಾರಿದ್ದಾರೆ. ಎಲ್ಲಿಂದ ಇವುಗಳ ಸರಬರಾಜು ಆಗುತ್ತಿದೆ. ಯಾರು ನಿರ್ವಹಣೆ ಮಾಡುತ್ತಿದ್ದಾರೆ ಎಂಬ ಆಯಾಮದಲ್ಲಿ ತನಿಖೆ ನಡೆಸಲಾಗಿದೆ. ಅಷ್ಟೇ ಅಲ್ಲ, ಈ ಘಟನೆಯಲ್ಲಿ ಯಾರು ಭಾಗಿಯಾಗಿದ್ದಾರೆ. ಈ ಮಾದಕ ವಸ್ತುಗಳನ್ನು ಯಾರಿಗೆ ಸರಬರಾಜು ಮಾಡಲಾಗುತ್ತಿತ್ತು ಎಂಬ ಬಗ್ಗೆಯೂ ಅಧಿಕಾರಿಗಳಿಗೆ ತಿಳಿದಿದೆ ಎನ್ನಲಾಗಿದೆ.
ತನಿಖೆಯ ಕೇಂದ್ರ ಬಿಂದುವಾಗಿರುವ ಅಮೃತಸರ ಜತೆಗಿನ ನಂಟಿನ ಕುರಿತು ತನಿಖೆ ನಡೆಸಲಾಗುತ್ತಿದೆ. ಇದಕ್ಕಾಗಿ ಎನ್​ಸಿಬಿ ಯುಎಸ್​, ಯುಕೆ ಮತ್ತು ಆಸ್ಟ್ರೇಲಿಯಾ ಏಜೆನ್ಸಿ ಸಂಪರ್ಕ ಪಡೆಯಲಿದೆ ಎಂದು ತಿಳಿದುಬಂದಿದೆ. 2018ರಲ್ಲಿ 1,200 ಕಿ.ಗ್ರಾನಷ್ಟು ಕೊಕೈನ್​ ಭಾರತಕ್ಕೆ ಪೂರೈಕೆಯಾಗಿದ್ದು, ಇದರಲ್ಲಿ 300 ಗ್ರಾನಷ್ಟು ಮುಂಬೈಗೆ ಸರಬರಾಜಾಗಿದೆ. ಭಾರತಕ್ಕೆ ಅಂದಾಜು ಒಂದು ಟನ್​ ಅಫ್ಘಾನ್​ ಹೆರಾಯಿನ್​ ಸರಬರಾಜಾಗುತ್ತಿದ್ದು, ಪಂಜಾಬ್​ (ಪಾಕಿಸ್ತಾನದಿಂದ) ಅಥವಾ ಗುಜರಾತ್​ ಸಮುದ್ರ ಮಾರ್ಗದಿಂದ ಮುಂಬೈ ಸೇರುತ್ತಿದೆ. ಪಾಕಿಸ್ತಾನದ ಕೆಲ ರಾಜ್ಯಗಳು ಈ ಮಾದಕ ದ್ರವ್ಯದ ಹಣವನ್ನು ಭಯೋತ್ಪಾದಕ ನಿಧಿಗೆ ಬಳಸುತ್ತಿವೆ ಎಂದು ಹೇಳಲಾಗಿದೆ.