ಸಿಪಿಎಂ ನಾಯಕ ಕೊರೋನಾಗೆ ಬಲಿ

ಕೊಲ್ಕೊತ್ತಾ: ಪಶ್ಚಿಮ ಬಂಗಾಳದ ಸಿಪಿಎಂನ ಹಿರಿಯ ನಾಯಕ, ಸಿಪಿಎಂನ ಕೇಂದ್ರ ಸಮಿತಿಯ ಹಾಲಿ ಸದಸ್ಯ ಶ್ಯಾಮಲ್ ಚಕ್ರವರ್ತಿ (76) ಗುರುವಾರ (ಆ.6) ಕೊರೋನಾಗೆ ಬಲಿಯಾಗಿದ್ದಾರೆ.
ಚಕ್ರವರ್ತಿ ಅವರಿಗೆ ಪುತ್ರಿ ಹಾಗೂ ನಟಿ ಉಶಾಸಿ ಚಕ್ರವರ್ತಿ ಇದ್ದಾರೆ. 1982 ಹಾಗೂ 1996ರ ನಡುವೆ ಮೂರು ಬಾರಿ ಪಶ್ಚಿಮಬಂಗಾಳದ ಸಾರಿಗೆ ಸಚಿವರಾಗಿ ಕಾರ್ಯನಿರ್ವಹಿಸಿದ್ದ ಶ್ಯಾಮಲ್ ಚಕ್ರವರ್ತಿ ಅವರಿಗೆ ಕಳೆದ ತಿಂಗಳ ಅಂತ್ಯದಲ್ಲಿ ಕೊರೋನಾ ಸೋಂಕು ಇರುವುದು ದೃಢಪಟ್ಟಿತ್ತು. ಅವರನ್ನು ಇಲ್ಲಿನ ಪೀಯರ್‌ಲೆಸ್ ಆಸ್ಪತ್ರೆಯಲ್ಲಿ ಜುಲೈ 30ರಂದು ದಾಖಲಿಸಲಾಗಿತ್ತು. ನಂತರ ಆಗಸ್ಟ್ 1ರಂದು ವೆಂಟಿಲೇಟರ್‌ನಲ್ಲಿ ಇರಿಸಲಾಗಿತ್ತು. ಅವರಿಗೆ ಗುರುವಾರ ಬೆಳಗ್ಗೆ ಹೃದಯಾಘಾತ ಸಂಭವಿಸಿತ್ತು. ಅಪರಾಹ್ನ 1.50ಕ್ಕೆ ಮತ್ತೊಮ್ಮೆ ಸಂಭವಿಸಿದ ಹೃದಯಾಘಾತದಿಂದ ಅವರು ಮೃತಪಟ್ಟಿದ್ದಾರೆ ಎಂದು ಆಸ್ಪತ್ರೆಯ ವೈದ್ಯರು ತಿಳಿಸಿದ್ದಾರೆ.
ಶ್ಯಾಮಲ್ ಚಕ್ರವರ್ತಿ ಅವರು ವ್ಯಾಪಾರಿ ಒಕ್ಕೂಟದ ಹಾಗೂ ಸಿಐಟಿಯು ಕಾರ್ಯಕಾರಿ ಸಮಿತಿ ಸದಸ್ಯರಾಗಿದ್ದರು. ಈ ಹಿಂದೆ ಅವರು ಸಿಪಿಎಂನ ರಾಜ್ಯಸಭಾ ಸದಸ್ಯ, ಸಿಐಟಿಯುನ ರಾಜ್ಯ ವರಿಷ್ಠ ಹಾಗೂ ಸಿಪಿಎಂ ರಾಜ್ಯ ಸಮಿತಿಯ ಸದಸ್ಯರಾಗಿ ಕಾರ್ಯ ನಿರ್ವಹಿಸಿದ್ದರು.