ಸೆಲ್ಫಿ ತೆಗೆಯಲು ಹೋಗಿ ಪ್ರವಾಹದಲ್ಲಿ ಸಿಲುಕಿದ ಹುಡುಗಿಯರು…

ಭೋಪಾಲ್​: ಸೆಲ್ಫಿ ತೆಗೆಯಲು ಹೋದ ಇಬ್ಬರು ಹುಡುಗಿಯರು ಪೆಂಚ್​ ನದಿ ಪ್ರವಾಹದಲ್ಲಿ ಸಿಲುಕಿ ಒಂದು ಗಂಟೆ ಕಾಲ ಪರದಾಡಿದ್ದಾರೆ.
ಛಿಂದ್ವಾರ ಬಳಿ ಈ ಘಟನೆ ನಡೆದಿದೆ. ಮಧ್ಯಪ್ರದೇಶದ ರಾಜಧಾನಿ ಭೋಪಾಲ್​ನಿಂದ 273 ಕಿ.ಮೀ ದೂರದಲ್ಲಿರುವ ಛಿಂದ್ವಾರ ಜಿಲ್ಲೆಯ ಪೆಂಚ್​ ನದಿ ಪ್ರವಾಹದಲ್ಲಿ ಸಿಲುಕಿದ್ದ ಈ ಇಬ್ಬರು ಹುಡುಗಿಯರನ್ನು ಸ್ಥಳೀಯ ಪೊಲೀಸರು ರಕ್ಷಿಸಿದ್ದಾರೆ.
ಜುನ್ನಾರ್ಡಿಯೋ ಪಟ್ಟಣದಿಂದ ಆರು ಹುಡುಗಿಯರು ಪಿಕ್​ನಿಕ್​ಗಾಗಿ ಬೆಲ್ಖೇದಿ ಗ್ರಾಮದಲ್ಲಿರುವ ಪೆಂಚ್​ ನದಿ ಪ್ರದೇಶಕ್ಕೆ ಬಂದಿದ್ದಾಗ ಈ ಘಟನೆ ನಡೆದಿದೆ. ಪಿಯು ವಿದ್ಯಾರ್ಥಿನಿಯರಾದ ಮೇಘ ಜಾವ್ರೆ ಮತ್ತು ವಂದನಾ ತ್ರಿಪಾಠಿ ಉತ್ತಮ ಸೆಲ್ಫಿ ತೆಗೆಯಲು ನದಿ ಮಧ್ಯದ ಬಂಡೆಗಳ ಮೇಲೆ ನಿಂತು ಸೆಲ್ಫಿ ಕ್ಲಿಕ್ಕಿಸಿಕೊಳ್ಳಲು ಮುಂದಾದ ವೇಳೆಯಲ್ಲೇ ನದಿ ನೀರಿನ ಮಟ್ಟ ಹೆಚ್ಚಿ ಪ್ರವಾಹದಲ್ಲಿ ಸಿಲುಕಿದ್ದಾರೆ. ಈ ವೇಳೆ ಇಬ್ಬರೂ ಹುಡುಗಿಯರು ಕಿರುಚಿದ್ದು, ನದಿ ದಡದಲ್ಲಿದ್ದವರು ಪೊಲೀಸರಿಗೆ ವಿಷಯ ತಿಳಿಸಿದ್ದಾರೆ. 12 ಪೊಲೀಸರು ಕಾರ್ಯಾಚರಣೆ ನಡೆಸಿ ವಿದ್ಯಾರ್ಥಿನಿಯರನ್ನು ರಕ್ಷಿಸಿದ್ದಾರೆ. ಗಾಬರಿಗೊಳಗಾಗಿದ್ದ ಅವರು ಮಾತನಾಡಲೂ ಹೆದರುತ್ತಿದ್ದರು ಎಂದು ಪೊಲೀಸ್​ ಅಧಿಕಾರಿ ಸಿಂಗ್​ ತಿಳಿಸಿದ್ದಾರೆ.