ಶಾಸಕ ಸಿದ್ದು ಸವದಿ ಮನೆಯೆದುರು ಜೈನ ಮುನಿ ಪ್ರತಿಭಟನೆ 

ಬಾಗಲಕೋಟೆ: ತೇರದಾಳ ಶಾಸಕ ಸಿದ್ದು ಸವದಿ ಅವರ ಬನಹಟ್ಟಿ ನಿವಾಸದ ಎದುರು ಜೈನ ಮುನಿ ಹಳಂಗಳಿಯ ಭದ್ರಗಿರಿ ಬೆಟ್ಟದ ಕುಲರತ್ನ ಭೂಷಣ ಮಹಾರಾಜರು ಶನಿವಾರ ಆಮರಣ ಉಪವಾಸ ಸತ್ಯಾಗ್ರಹ ಆರಂಭಿಸಿದ್ದಾರೆ.ಬೇಡಿಕೆ ಈಡೇರುವರೆಗೂ ಶಾಸಕರ ಮನೆ ಮುಂದೆ ಆಮರಣ ಉಪವಾಸ ಮಾಡಲು ಶ್ರೀಗಳು ನಿರ್ಧರಿಸಿದ್ದಾರೆ.  ಜಿಲ್ಲೆಯ ರಬಕವಿ-ಬನಹಟ್ಟಿ ತಾಲೂಕಿನಲ್ಲಿ ಹಳಂಗಳಿಯ ಭದ್ರಗಿರಿ ಬೆಟ್ಟದಲ್ಲಿನ ಕಂದಾಯ ಇಲಾಖೆ ಭೂಮಿಯ 83.30 ಎಕರೆ ಜಾಗದಲ್ಲಿ ಪುನರ್ ವಸತಿ ಕೇಂದ್ರ ಸ್ಥಾಪನೆಗೆ ಮುಂದಾಗಿರುವ ಸರ್ಕಾರದ ಕ್ರಮಕ್ಕೆ ಮುನಿಗಳು ವಿರೋಧ ವ್ಯಕ್ತಪಡಿಸಿದ್ದಾರೆ. ಇಲ್ಲಿ ಲಕ್ಷಾಂತರ ಗಿಡಗಳನ್ನು ನೆಡಲಾಗಿದೆ. ಈ ಜಾಗದಲ್ಲಿ ಜೈನರ 603 ಗುಂಪಾಗಳು ಇವೆ. ಈ ಜಾಗವನ್ನು ಭದ್ರಗಿರಿ ಬೆಟ್ಟಕ್ಕೆ ಕೊಡಬೇಕು. 83.30 ಎಕರೆ ಜಾಗ ಬಿಟ್ಟು ಕಂದಾಯ ಇಲಾಖೆಯ ಇತರೆ ಜಾಗದಲ್ಲಿ ಪುನರ್ ವಸತಿ ಕಲ್ಪಿಸಿ ಎಂದು ಶ್ರೀಗಳು ಆಗ್ರಹಿಸಿದ್ದಾರೆ. ತಹಸೀಲ್ದಾರ ಪ್ರಶಾಂತ ಚನಗೊಂಡ ಹಾಗೂ ಪೊಲೀಸರು‌ ಭೇಟಿ ನೀಡಿದ್ದು, ಶ್ರೀಗಳ ಮನವೊಲಿಕೆಗೆ ಯತ್ನಿಸಿದರೂ ಶ್ರೀಗಳು ಒಪ್ಪಿಲ್ಲ.