2024 ಕ್ಕೆ ಎಲ್ಲ ರೈಲುಗಳ ವಿದ್ಯುದೀಕರಣ: ಪೀಯೂಷ್

ನವದೆಹಲಿ: 2024ರ ವೇಳೆಗೆ ಭಾರತೀಯ ರೈಲುಗಳು ಶೇ.100 ವಿದ್ಯುದೀಕರಣಗೊಳ್ಳಲಿವೆ ಎಂದು ಕೇಂದ್ರ ಸಚಿವ ಪೀಯೂಷ್​ ಗೋಯಲ್​ ತಿಳಿಸಿದ್ದಾರೆ.
2030ರೊಳಗೆ ರೈಲುಗಳನ್ನು ಹೊಗೆರಹಿತ ಗಾಡಿಗಳನ್ನಾಗಿ ರೂಪಿಸಲಾಗುವುದು. 2024ರ ಹೊತ್ತಿಗೆ ಎಲ್ಲ ರೈಲುಗಳು ವಿದ್ಯುತ್​ ಚಾಲಿತವಾಗಲಿವೆ. ಎಲ್ಲ ರೈಲುಗಳು ವಿದ್ಯುದ್ದೀಕರಣಗೊಳ್ಳುತ್ತಿರುವುದು ಭಾರತದಲ್ಲೇ ಮೊದಲು. ಈ ಯೋಜನೆಗೆ ಬ್ರೆಜಿಲ್​ನ ಸಹಯೋಗ ಪಡೆಯಲು ಯೋಜಿಸಲಾಗಿದೆ ಎಂದರು.
ಅಮೆರಿಕ, ರಷ್ಯಾ ಮತ್ತು ಚೀನಾ ಹೊರತುಪಡಿಸಿ ಭಾರತ ಅತಿದೊಡ್ಡ ರೈಲು ಸೌಲಭ್ಯವುಳ್ಳ ನಾಲ್ಕನೇ ಅತಿ ದೊಡ್ಡ ರಾಷ್ಟ್ರವಾಗಿದೆ. ಇದು ದೇಶಾದ್ಯಂತ 67,368 ಕಿ.ಮೀ ಉದ್ದ ಹಾಗೂ 7,300 ನಿಲ್ದಾಣಗಳನ್ನು ಹೊಂದಿದೆ. ಪ್ರತಿನಿತ್ಯ 23 ಮಿಲಿಯನ್​ ಪ್ರಯಾಣಿಕರು 13 ಸಾವಿರ ರೈಲುಗಳಲ್ಲಿ ಪ್ರಯಾಣಿಸುತ್ತಾರೆ ಎಂದು ಸಚಿವ ಗೋಯಲ್ ತಿಳಿಸಿದರು.