ಉರಗ ಕುರುಹುಗಳಿಗೆ ಮಾರ್ಸ್ ಸಾಕ್ಷಿ

ಅಮೆರಿಕ: ಮಾರ್ಸ್ ನೆಲದಲ್ಲಿ ಕ್ರಿಮಿ ಕೀಟ, ಉರಗಗಳಿರುವ ಕುರುಹು ಪತ್ತೆಯಾಗಿದೆ. ನಾಸಾ ಕಳುಹಿಸಿರುವ ಕ್ಯೂರಿಸಿಟಿ ರೋವರ್ ಎಂಬ ರೋಬೋ ಉಪಕರಣವು ಮಾರ್ಸ್ ನೆಲವನ್ನು ಜಾಲಾಡುತ್ತಿದೆ. ಈ ರೋವರ್ ಅಲ್ಲಿನ ಫೋಟೋಗಳನ್ನು ಕ್ಲಿಕ್ಕಿಸುವುದೂ ಸೇರಿದಂತೆ ಹಲವು ಕಾರ್ಯಗಳನ್ನು ಮಾಡುತ್ತಿದೆ. ರೋವರ್ ಕಳುಹಿಸಿರುವ ಫೋಟೋಗಳನ್ನು ವಿಜ್ಞಾನಿಗಳು ಕುತೂಹಲದಿಂದ ಪರಿಶೀಲನೆ ನಡೆಸುತ್ತಿದ್ದಾರೆ. ಈ ವೇಳೆ, ಹಲವು ವರ್ಷಗಳಿಂದ ಮಂಗಳ ಗ್ರಹದ ನೆಲದ ಫೋಟೋಗಳನ್ನು ಅಧ್ಯಯನ ಮಾಡುತ್ತಿರುವ ಓಹಿಯೋ ವಿಶ್ವವಿದ್ಯಾಲಯದ ವಿಜ್ಞಾನಿ ವಿಲಿಯಮ್ ರೋಮೋಸರ್ ಎಂಬುವರು ಹಲವು ಸುಳಿವುಗಳನ್ನು ಪತ್ತೆ ಮಾಡಿದ್ದಾರೆ. ಜೀವಂತ ಇರುವ ಕ್ರಿಮಿ ಕೀಟಗಳು ಅವರ ಕಣ್ಣಿಗೆ ಬಿದ್ದಿವೆ. ಹಾಗೆಯೇ, ಕ್ರಿಮಿಕೀಟಗಳ ಪಳೆಯುಳಿಕೆಗಳೂ ಕಂಡುಬಂದಿವೆ. ಜೇನು ಹುಳು ಹೋಲಿಕೆ ಇರುವ ಕೀಟ; ಹಲ್ಲಿಯಂತಹ ಉರಗ ಇತ್ಯಾದಿಯನ್ನು ಹೋಲುವ ವಸ್ತುಗಳು ಕಂಡಿವೆ.