ವಿಶ್ವದೆಲ್ಲೆಡೆ ಸಡಗರದ ಹೊಸ ವರ್ಷಾಚರಣೆ

ಜಗತ್ತಿನಾದ್ಯಂತ 2020ನೇ ಹೊಸ ವರ್ಷವನ್ನು ಜನರು ಸಂಭ್ರಮದಿಂದ ಬರಮಾಡಿಕೊಂಡರು.
ನ್ಯೂಜಿಲೆಂಡ್ ಹಾಗೂ ಆಸ್ಟ್ರೇಲಿಯಾಗಳಲ್ಲಿ ಜನರು ಕುಣಿದು ಕುಪ್ಪಳಿಸಿ 2020ನೇ ವರ್ಷವನ್ನು ಅದ್ದೂರಿಯಾಗಿ ಬರಮಾಡಿಕೊಂಡಿದ್ದಾರೆ. ಆಸ್ಟ್ರೇಲಿಯಾದ ಸಿಡ್ನಿ ಹಾರ್ಬರ್​ ಸೇತುವೆ ಮೇಲೆ ಹೊಸವರ್ಷ ಆಚರಣೆ ಜೋರಾಗಿಯೇ ನಡೆಯಿತು.
ಆಸ್ಟ್ರೇಲಿಯಾದ ಪ್ರಧಾನಿ ಸ್ಕಾಟ್ ಮಾರಿಸನ್​ ಅವರು, ಜಗತ್ತಿಗೆ ನಾವು ಎಷ್ಟು ಆಶಾವಾದಿಗಳು, ಕ್ರಿಯಾತ್ಮಕವಾಗಿದ್ದೇವೆ ಎಂದು ತೋರಿಸಲು ಹೊಸ ವರ್ಷಾಚರಣೆ ಉತ್ತಮ ಮಾರ್ಗ ಎಂದು ಹೇಳಿದ್ದರಿಂದ ಜನರ ಉತ್ಸಹ ಹೆಚ್ಚಿತ್ತು.
ಹಾರ್ಬರ್ ಸೇತುವೆ ಮೇಲಂತೂ ಮನಮೋಹಕ ಸಂಗೀತ, ಬಣ್ಣದೋಕುಳಿಯೊಂದಿಗೆ ಆಸ್ಟ್ರೇಲಿಯನ್ನರು ಹೊಸವರ್ಷವನ್ನು ಸಡಗರದಿಂದ ಸ್ವಾಗತಿಸಿದರು.
ಆಕ್ಲೆಂಡ್​ನಲ್ಲಂತೂ ಭರ್ಜರಿ ಪಟಾಕಿಗಳನ್ನು ಸಿಡಿಸಲಾಗಿದೆ. ಇಲ್ಲಿನ ಸ್ಕೈ ಟವರ್​ ಬಳಿ ಸಾವಿರಾರು ಜನ ಸೇರಿ ಹೊಸವರ್ಷವನ್ನು ಸ್ವಾಗತಿಸಿದ್ದಾರೆ. ಈ ಟವರ್​ ಮೇಲೆ ಇದೇ ಮೊದಲ ಬಾರಿ ಲೇಸರ್​ ಮತ್ತು ಅನಿಮೇಶನ್​ ಮೂಲಕ ಹೊಸವರ್ಷದ ಚಿತ್ತಾರ ಮೂಡಿಸಲಾಗಿತ್ತು. ನ್ಯೂಜಿಲೆಂಡ್​ ಉಳಿದ ನಗರಗಳಲ್ಲೂ ಹೊಸವರ್ಷ ಸಂಭ್ರಮಾಚರಣೆ ಜೋರಾಗಿತ್ತು.
ಜಪಾನ್​ನ ಟೋಕಿಯೋದಲ್ಲಿ ಪಟಾಕಿ ಸಿಡಿಸುವ ಮೂಲಕ ಹೊಸ ವರ್ಷಕ್ಕೆ ಸ್ವಾಗತ ಕೋರಲಾಯಿತು.