ಸಿಡ್ನಿ: ಭಾರತದೊಂದಿಗೆ ರಾಜತಾಂತ್ರಿಕ ಸಂಬಂಧಗಳಿಗಾಗಿ ವಿಡಿಯೋ ಸಂವಾದ ನಡೆಸಲು ಮುಂದಾಗಿರುವ ಆಸ್ಟ್ರೇಲಿಯಾ ಪ್ರಧಾನಿ ಸ್ಕಾಟ್ ಮಾರಿಸನ್, ಇದರ ಪೂರ್ವಸಿದ್ಧತೆ ಎಂಬಂತೆ ಭಾರತದ ರುಚಿಕರ ಸ್ನ್ಯಾಕ್ಸ್ ಸಮೋಸಾ ಹಾಗೂ ಮಾವಿನಕಾಯಿ ಚಟ್ನಿಯನ್ನು ತಾವೇ ಸಿದ್ಧಪಡಿಸಿದ್ದು ಈ ವಿಚಾರವನ್ನು ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ.
ಈ ಕುರಿತು ಟ್ವೀಟ್ ಮಾಡಿರುವ, ಆಸ್ಟ್ರೇಲಿಯಾ ಪ್ರಧಾನಿ, ಸ್ಕೊಮೋಸಾ ( ಸಮೋಸಾ)ಮತ್ತು ಮ್ಯಾಂಗೋ ಚಟ್ನಿಯನ್ನು ನಾನೇ ತಯಾರಿಸಿದ್ದೇನೆ. ಇದನ್ನು ಸಸ್ಯಾಹಾರಿಯಾಗಿರುವ ಭಾರತದ ಪ್ರಧಾನಿ ನರೇಂದ್ರ ಮೋದಿಯವರ ಜತೆ ಸೇವಿಸಲು ಇಚ್ಛಿಸುತ್ತೇನೆ ಎಂದಿದ್ದಾರೆ.
ಇನ್ನು ಸ್ಕಾಟ್ ಮಾರಿಸನ್ ಈ ಟ್ವೀಟ್ ಗೆ ಪ್ರತಿಕ್ರಿಯಿಸಿರುವ ಪ್ರಧಾನಿ ನರೇಂದ್ರ ಮೋದಿ, ನೀವು ತಯಾರಿಸಿದ ಸಮೋಸಾ ರುಚಿಯಾಗಿ ಕಾಣುತ್ತಿದೆ. ಕೋವಿಡ್ 19 ವಿರುದ್ಧ ನಾವು ವಿಜಯ ಸಾಧಿಸಿದ ಬಳಿಕ ನಾವು ಒಟ್ಟಿಗೆ ಕೂತು ಸಮೋಸಾ ಸವಿಯೋಣ ಎಂದು ಮರು ಟ್ವೀಟ್ ಮಾಡಿದ್ದಾರೆ.
ಇದೇ ಬರುವ ಜೂನ್ 4 ರಂದು ಆಸ್ಟ್ರೇಲಿಯಾ ಪ್ರಧಾನಿ ಸ್ಕಾಟ್ ಮಾರಿಸನ್ ಹಾಗೂ ಪ್ರಧಾನಿ ನರೇಂದ್ರ ಮೋದಿ ವಿಡಿಯೋ ಸಂವಾದ ನಡೆಸಲಿದ್ದಾರೆ. ಅದಕ್ಕೂ ಮುನ್ನವೇ ಸ್ವತಃ ಆಸ್ಟ್ರೇಲಿಯಾ ಪ್ರಧಾನಿ ಅಡುಗೆ ಮನೆಯಲ್ಲಿ ಭಾರತೀಯ ತಿನಿಸು ತಯಾರಿಸಿರುವುದು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.
ಸಮೋಸಾ, ಮಾವಿನಕಾಯಿ ಚಟ್ನಿ ತಯಾರಿಸಿದ ಆಸ್ಟ್ರೇಲಿಯಾ ಪ್ರಧಾನಿ ಸ್ಕಾಟ್!
